Dem boys seh… Nanda mek innocent pay fuh de guilty
When a man desperate he does lash out. He does do some things that in he sane moments he wouldn’t do.
Dem boys skin up de Office of de President dem know that dem woulda see retaliation. Bharrat try to explain de situation after Kwame lie. But is Nanda who does act fuh Roger Luncheon that pelt de lash.
He call all of dem who sign fuh de computer and he question dem. Den dem boys hear when he seh that if wasn’t some gyal name Marcelle then was God who give de Waterfalls paper de information. He send home Marcelle.
Dem boys seh that he could do that now because he know that People really peaceful and people can tek advantage.
But is funny how he believe that he bright. Same way ho he can’t solve de problem of who thiefing money from New Building Society is de same way he can’t solve de computer leak.
Dem boys know wheh dem get de receipts and is from a big one in Office of de President. This big one get it from Nanda. Perhaps is shame mek he send home de gyal.
Talk half. Lef half.