Dem Boys seh… Bharrat try to meet Fine Man

There was a time when de government people use to run to seh something suh dem name could appear in de papers every day. Now, dem boys want to know if all of dem dumb. Dr Leslie always had something to talk about suh till he colleagues decide that he talking too much and getting too much publicity.
Now de media want dem same Ministers talk and none of dem even opening dem mouth. Robeson grab de spotlight wid a hammer now he bobbin’ and weavin’ behind some grader that Fip bring in. Yesterday when he finally open he mouth he tell dem reporters that they must go and find out things for demself. Like he stop talk fuh good?
De thing is that he get involve because Ashni and Brassy who was defending Fip run and lef he. Is only Robeson was stupid enough to talk ‘bout that issue. Is when he hear dem boys gun cuss he break he silence.
But de man smart. He carry de thing to Linden because he know that some of dem media house don’t have money suh dem can’t reach Linden. And then if he decide pun de GINA pass then people woulda travel up there fuh nutten.
Bharrat decide to steal de show too. He went to Buxton to meet Fine Man.
Talk half. Lef half.