Dem boys seh…Guyana got a visiting president
Last night dem boys turn on dem TV and dem hear that Guyana got a visiting President. In dem other country de President live deh and he always meeting wid he people. But lo and behold, de Guyana President live overseas and he does visit he people once in a while.
That couldn’t be because when dem boys want to cuss somebody Bharrat was always there. Suh it was strange that people can describe he as a visiting president.
Of course he was in Kuwait, Turkey, London, Iran, Jamaica, Venezuela, China, and de States in three weeks.
He also visit Berbice, Lethem, Bartica and Linden but then dem boys realize that dem place in Guyana. It mean that de man don’t sleep in he bed and it got to be that he frighten to stay one place too long.
De last time dem had a blackout in town de man was on de plane and when de lights come back he touchdown like if is he controlling de lights.
Dem boys seh that people got to understand that running a country mean just that. You got to run out of de country and run back when you think is time to get some exercise again.
Talk half. Lef half.
