Dem boys seh…Dem boys placing bets pun de Kuwait Prime Minister
Bharrat wouldn’t put he up at Pegasus or at Princess because heself tell a reporter that two hotel not good enough fuh tourists.
De Prime Minister is not a tourist. In fact he more rich that any tourist who would come to Guyana suh if dem two hotel not good fuh tourists dem certainly not good for de man. That is how dem boys want to know wheh de man gun stay.
It might be that he gun stay in State House. That mean that Bharrat got to give up he bed. Or de man might stay at Duke Lodge right across from de United States Embassy.
But that got problems because security does close off de area wheh prominent people does stay. That mean that people who got to go to de embassy can’t go and everybody know that de Americans don’t stop dem business fuh anybody.
Dem can put up de Prime Minister in Camp Ayanganna but de rooms not good enough. Wheh this man staying? Dem boys placing bets. One man seh Princess because de owners from Turkey and dem is Muslim like de Prime Minister.
Some seh Pegasus because de Queen sleep deh but most seh de Marriott, at least de place wheh de government planning to build de Marriott.
