Dem boys seh…De beauty pageant is fuh ugly people
Some gyal going on stage to try fuh represent this country at de Miss Guyana pageant. Dem sash and dem have sponsors but dem same sponsors claim that dem didn’t have much of a choice.
Is a case wheh de sponsors watch every face and in de end dem decide to pick anyone because wasn’t much of a difference. All de gyal dem ugly and dem boys want to know if is a special parade.
Dem boys seh that de organisers shoulda lef de pageant as a local pageant. People woulda‘ tek de pageant as a form of entertainment but fuh tell people that dem selecting one of dem to represent Guyana is an insult.
Thank heavens is only eight but de selection process gun be difficult. It hard to pick one ugly woman from another.
Is that pageant mek de Prime Minister from Kuwait coming one day later. In Kuwait a man can’t look at a half naked woman and if he did come Bharrat woulda want to carry he to de pageant and de man couldn’t seh no.
And de price. Well dem boys seh that every biscuit got its own cheese and if people want to pay fuh see ugly people is dem business.
Talk half. Lef half.
