Dem boys seh…Fowl Cock get tread
Yesterday dem boys had to talk bout de secrecy and how everything is a secret. Even de government people keeping secret and that is why dem reporters trying to get a Freedom of Information Act.
Wid de Act dem reporters believe that dem gun be able to get all de information dem want but dem wrong because de government always finding ways to dodge de system.
Well dem boys got a plan. Dem talk to Anand and some other dentist. De plan is that when a government man refuse to answer a question dem boys gun send he to a dentist.
No Novocain—de thing poor people does call cocaine—and drag out he teeth till he talk.
Dem boys seh that after that nuff people gun be mekking dentures.
But de story is more than that. Fowl Cock get tread and is de government tread he. De man build a sluice near Tuschen and he charge nuff money. He smile when he get de contract. Now he vex. He ain’t get pay fuh de wuk.
Fowl Cock is a man who always got he tail up in de air. De government people mek mistake and tek de tail in de air as an invitation.
Talk half. Lef half.
