Latest update June 27th, 2026 12:06 AM
Dem Boys Seh… Dem fall out
When whores and thieves fall out is a big story. Is de same thing when contractor and government fall out.
Dem boys seh that BK built a stelling how dem engineers draw de plan and tell he. But something draw wrong and de stelling or wharf as de big shots does seh, fail to wuk. Well is then de story start.
De thing been good, good. Nobody was using it fuh two years and all was well. Up come some reporter and report how de stelling was a white elephant and de trouble start. Somebody seh how no truck cant drive off because it gun sink. De government decide to act and build another pontoon.
Then dem boys hear that de stelling open and de story start. As soon as dem start to use it a truck nearly fall over board. De government seh that is not dem fault. De contractor seh that is not he fault but he go further. He blame de government. Is suh de real story start.
De government start fuh cuss de contractor and de contractor cuss back. Now de government claim how it looking fuh sue de contractor. But government can’t sue; dem boys know that.
But de stelling still ain’t wukking and Bharrat seh how he gun get experts fuh fix it. De story ain’t done and dem boys waiting.
Talk half. Lef half.
Share this:
Discover more from Kaieteur News
Subscribe to get the latest posts sent to your email.