Dem boys seh….Waterfalls paper circulation double
De Waterfalls paper price increase $20 more and immediately de circulation double. People understand everything wha happening and dem behind de paper fully.
When dem boys see de circulation double dem scratch dem head because dem couldn’t understand. Is when dem hear that all de people decide to support de paper by buying two everyday that dem realise how de circulation double. Everybody decide to buy one fuh dem and one fuh de neighbour.
But dem boys had to laugh. Couple people come back and tell de Waterfalls boss man that dem neighbour can’t read. But de neighbour still tekking de paper and when dem boys ask why, de neighbour seh it got nice picture—dem nice gyal, dem muscle people, dem dead bandits and beauty of de week.
De thing mek some people cry, not because de Waterfalls paper got support but because some other paper couldn’t sell. De hard time paper drop it price but nobody still ain’t buying. Dem put it in a minibus and guh by de market and share out like how some people does share out church literature and people ain’t tek.
Dem boys seh that dem also can’t tek all this picture wha dem see all over de place bout this champion of de earth. Hammy seh that if de man is a champion of de earth how come he mek Uncle Freddie know that Georgetown is de stinkest city on earth.
Dem boys seh that dem gun put up dem own poster next to every one of de champion of de earth. Dem boys putting one wid koker, pump, stelling, helicopter, Skeldon factory, and one wid Fip.
Talk half. Lef half fuh now.