Delta mek Glenn and Bharrat smell bad
Old people always seh that when you lef you house you must full you belly. You never know when you gun eat. And nuff Guyanese tek de advice. Bharrat eat and drink before he ketch de plane Sunday morning.
De Waterfalls boss Man didn’t eat home but he go to de First Class lounge and he eat before he guh pun de plane. Other people walk wid dem food. Some walk wid fry chicken and some wid dem roti and curry.
De thing is that this time all who eat and full dem belly shame today. De plane flying to New York when all of a sudden face mask fall down in front of dem. That was de first release of dem stomach. But not everybody. Some vomit.
After a long time de pilot announce that he got to mek an emergency landing. More stomach empty through de rear end and de cabin start fuh smell. Dem boys seh is a funny thing how fear does move from person to person. As one sphincter relax another sphincter and de relay continue.
Dem boys seh that Bharrat was cool. Is only when people watch he real close that dem see some sweat pun he lip and at de top of he head. De plane land and was smiles.
That is why dem boys couldn’t understand how Bharrat pants had some strange stains when de plane touch down in Florida. Is when somebody tell him that de plane had to mek an emergency landing before it mek a second one in Florida that people understand.
De plane land in Puerto Rico, get fix and then tek off. Halfway to New York was problems again. Bharrat and Glenn hug up. Dem sure that dem time come and dem had to mek peace. Is then both of dem mess demself.
Glenn claim how he coming back to Guyana by boat and Bharrat doing de same. Talk half. Lef half.