Dem boys seh…Kwame do it again
Is funny how when people get ketch in trouble dem does always try fuh implicate others. Kwame get in trouble again and he vex. He cuss up de police and dem boys talk de story. Right away Kwame get vex.
He write a letter which de state owned Chronicle carry. Now that newspaper boast that it is de most widely circulated paper. But Kwame know different suh he beg de waterfalls paper fuh carry he letter. De Waterfalls boss man tell he to screw heself.
Dem boys seh that dem surprise when Kwame write again, this time claiming that de Waterfalls boss man was a Big market vendor who must explain how he get he riches.
Right away dem boys run to de Waterfalls boss man who admit that he was a vendor for 30 years and that is how he mek he money.
He then tun and seh Kwame must explain how he find Julius. He must also tell de police because dem can’t find Julius. De Waterfalls boss man also seh that Kwame must tell people wha he been doing fuh 30 years; that whatever he was doing begin wid ‘B’ same as business but certainly not business except fuh de first two letters in de word.
Is after de Kwame letter that other things come out. Dem boys seh that Kwame been pun West Demerara and de police stop he and tell he that dem have to test he fuh alcohol. De policeman tell he that he got to blow.
Dem boys shame. Kwame tell de policeman that it alright and try to tek down de policeman’s zipper.
Is a good thing de man holler and hold up de breathalyzer machine. Talk half. Lef half.