Dem boys seh… Dem watching everything in 2010
Last night was suppose to be a special night. Was Old Year’s Night. Dem boys listen to TV and dem hear bout Blue Moon and how it tek 20 years fuh Blue Moon come pun de New Year.
From de time dem boys hear de news dem decide that dem got to see de moon. Dem tell all dem friend and dem keep a look out.
Whole night dem watch and de moon colour didn’t change. Dem still cussing everybody who talk bout Blue Moon.
But dem had de lovers who know bout Blue Moon and who decide to go pun de seawall
But de wave from de spring tide wet dem. Some deh in hospital.
Well one thing is certain. Dem boys she that dem will be nice to all who nice to dem. Dem seh that dem gun be good to all who good to dem; kind to all who kind to dem; and decent.
De New Year is a good place to mek promises suh dem mek resolution. Dem promise to keep a close, close eye pun all dem politicians because dem don’t trust dem.
De promise to examine all dem contract and de contractors. Some of dem is wannabe and just come. Dem see how dem old ones fleecing de coffers. Dem boys seh that this is a different year —2010.
Dem who does get super salary gun get special watch. Dem boys buy special glasses, even night vision binoculars fuh watch dem. And dem got three Peeping Tom—one fuh peep at de top, one at de bottom and one to peep in de centre..
Dem boys seh dem watching young gyal too; and when dem seh young dem mean above 16, Priya..
Talk half. Lef half.