Dem boys seh…Robert inspecting pig penis
Dem boys seh that politicians smart. When nutten ain’t happening dem got to mek something happen. Some of dem does get de police to pick pun people then dem does hold press conference and talk about de matter.
Dem who ain’t got police contact does hold what dem call walkabout. Dem office does call all dem reporter and dem does walkabout shaking hands wid everybody. And dem stupid reporter and photographer does tek out de picture and then treat de whole thing like if is news.
Dem boys want fuh know since when shaking hands is news; or walking de street. Dem boys does walk pun de street and dem don’t mek news and even if reporters tek out dem photo is not news.
Well Robert, of Agriculture, smart. He know that wid Bharrat and Robert, of Congress Place, and even Hammy, walking about in Georgetown he can’t do de same thing and hope to mek news. He decide that he got to do other things.
Well de man hit de jackpot fuh de state media. He opening tilapia farm, he opening cow pen; he opening cane farm; he opening somebody front door; and he opening dem cow mouth. All of that is news.
Dem boys seh that dem always want to know how Robert does get so much publicity. Is only de other day dem notice that is nuff walkabout in de country wid he long boots and broad brim hat.
De man does pay fuh carry dem reporters then he does buy food fuh dem. Then he does call dem media boss and tell them to hold a space pun de news.
Tomorrow Robert holding a pig penis inspection campaign.
Talk half. Lef half.