Dem boys seh…Robeson can’t kiss
Any time somebody tell you that de hammer gun fall pun you, it mean trouble. Hammer does kill people and quite a few kill men with hammer. Dem mek de hammer fall pun dem. Only thing is that dem was holding de hammer.
Robeson mek de hammer fall pun a kissing bridge at a hotel build at West Demerara. De bridge look nice and even Robeson admit that it was pleasing to de eye.
Dem boys want to know if something pleasing to de eye why you gun destroy it. If a woman pleasing to you eye you ain’t gun destroy she, although dem boys got to admit that it does happen in some cases. That is why dem boys believe that something else had to happen.
When dem investigate dem find out that de man can’t kiss. That is strange. Even a dog can kiss. Babies from small does kiss but a big man like that can’t. That is why he hammer fall pun de kissing bridge.
Dem boys seh that dem have other structures that should come down. De other day de hammer fall pun some houses by Kitty. People claim how dem respect de activity but is when dem notice how de hammer missing three houses in de same area that dem begin to worry.
De more dem look is de more dem begin to worry about even-handedness. In de end dem stop worrying. Dem find out that de house belong to three party people.
Dem boys know that party does tek precedence in certain things like getting wuk. Dem have jobs that only party people can get. Prem get a job because he is a party man; de man at UG who can only talk bout sex is a party man and he get a job. Kwame is a party man?
Talk half. Lef half.